Холбооны Бүгд Найрамдах Герман болон Бельгийн хаант улсад зохион байгуулагдаж буй төр, иргэний нийгэм, хэвлэл мэдээлэл зэрэг оролцогч талуудын хамтын ажиллагаа, мэдээллийн ил тод байдлын талаар туршлага солилцох аялалд Хэвлэл мэдээллийн зөвлөлийн төлөөлөл оролцлоо. 

Тус үйл ажиллагаа нь 2025 оны 3 дугаар сарын 15-наас 22-ны хооронд үргэлжилсэн бөгөөд төрийн байгууллагууд хэвлэл мэдээлэлтэй хэрхэн хамтарч ажилладаг талаар болон үр дүнтэй хамтын ажиллагаа нь нийгэмд илтгэлцлийг бэхжүүлэхэд чухал нөлөөтэй, мөн сэтгүүлчид мэдээлэлтэй байх, түүнийгээ зөв ашиглах нь улс орны ардчиллыг бэхжүүлэхэд хэр чухал вэ зэрэг агуулгын хүрээнд болж байгаа юм.

Туршлага судлах аяллын бүрэлдэхүүнд Шүүхийн ерөнхий зөвлөл, Улсын дээд шүүхийн дэргэдэх Шүүхийн академи, Шүүхийн сахилгын хороо, Хэвлэл мэдээллийн зөвлөл, Оюуны инноваци ТББ, Gogo.mn сайт, Ханнс-Зайделийн сан болон ОУЭЗХБ-ын төлөөлөл багтав. Төлөөлөгчид Бавари мужийн Мюнхен хотын Дүүргийн Шүүх болон шүүхийн Хэвлэлийн алба, Бавари мужийн Хууль зүйн яам, Сэтгүүлчдийн холбоо, Шинэ хэвлэл мэдээллийн төв, Ерөнхий прокурорын газрын Хэвлэлийн алба болон Бельгийн Хаант Улсын Брюссель хотын Европын бодлогын судалгааны төв, Европын гадаад харилцааны алба, Европын Парламент, Европын Зөвлөл зэрэг байгууллагуудын төлөөлөлтэй уулзаж, шүүхийн ил тод, хариуцлагатай тогтолцоог төлөвшүүлэх, шүүх, хэвлэл мэдээлэл, ИНБ-ын хооронд үр дүнтэй харилцааны сувгийг бүрдүүлэх, хамтын ажиллагааг бэхжүүлэх чиглэлээр хоёр улсын шүүх эрх мэдлийн тогтолцоотой танилцаж, туршлага судаллаа.

Энэхүү үйл ажиллагаанаас хүлээгдэж буй үр дүн нь шүүх эрх мэдлийн байгууллагын олон нийтэд нээлттэй, ил тод мэдээлэл хүргэх тогтолцоог бэхжүүлэх замаар шүүхэд итгэх иргэдийн итгэлийг нэмэгдүүлэх явдал гэнэ. Тодруулбал, шүүхийн талаар мэдээ, мэдээллийг ойлгомжтой, энгийн байдлаар хүргэх, шүүхийн үйл ажиллагаа, шүүхийн шийдвэрийг нээлттэй ил тод мэдээлэх, хэвлэл мэдээлэл болон ИНБ-тай хамтран ажиллах, хамтын ажиллагааны стратеги болон олон нийттэй харилцах арга зүйг боловсруулах, Европын Холбооны шүүх, хэвлэл мэдээлэл, иргэний нийгмийн байгууллагын хоорондын туршлага солилцож, хамтын ажиллагааг өргөжүүлэх юм.

Туршлага солилцох аялал нь Олон улсын эрх зүйн хөгжлийн байгууллага (ОУЭЗХБ)-аас Европын Холбооны санхүүжилтээр хэрэгжүүлж буй “Шүүх эрх мэдлийн байгууллагын хамтын ажиллагаа ба ил тод байдал” төслийн хүрээнд Шүүхийн байгууллагын хэвлэл мэдээлэл болон ИНБ-ын хамтын ажиллагаа, олон нийттэй харилцах арга зүйд суралцах олон улсын туршлага судлах зорилгоор болсон юм. 

Тус аялалд ХМЗ-ийн гүйцэтгэх захирал Г.Гүнжидмаа Ханнс Зайделын сангийн дэмжлэгтэйгээр оролцлоо.